World's biggest hostage operation in action

source: dailymirror.lk (http://www.dailymirror.lk/DM_BLOG/Sections/frmNewsDetailView.aspx?ARTID=46965)

තේ උගුරේ කව...

බරක් නෙවෙයි උඹ අපට
සොයුරික් තවත්
උඹ වැනිම දසදහසක් අතර...
‍අම්ම අප්පා කොහේදැයි නොඅසා
බීපන් මේ තේ උගුර

බරක් නොවියන් රටට
ඉර නැගෙන හෙට දවසෙ
බබළාපන් රටම
මේ පුංචි මුතු ඇටය...
වැඩක් ඇති
මහ ගෑණියෙක් වෙලා...

ඡායාරූපය: defence.lk අඩවියෙන්

සිංහල බ්ලොග් මැරතන් 2009

සිංහල බ්ලොග් කරුවන්ගේ සංසදය සංවිධානය කරන සිංහල බ්ලොග් මැරතන් එක අදයි...!

පළමු බ්ලොග් මැරතන් එක 2008 වසරේ අප්‍රේල් මස 18දා පැවැත්වුන අතර මේ දෙවැන්නයි. මීට අමතරව මිනි බ්ලොග් මැරතන් තරඟයකුත් පසුගිය දෙසැම්බරයේ සංවිධානය වුනා. පළවෙනි බ්ලොග් මැරතන් එකට දුවන්න මට ඉඩ නොලැබුණු බව ඒකාලෙ හිටපු අයට නම් මතකත් ඇති. :)

දැන් ඉතිං දෙවන බ්ලොග් මැරතන් එකට පැය 24ක් පුරා දුවන්න සූදානම් වෙනවා. මේ පාර පළවෙනි මැරතන් එක දුවපු සපත්තු දාන්න හිතුවත්, කාලිංගයි බුද්ධිකයි කියනවා ඒවා මීයො කාලලු. ඉතිං දැං ඒක හද හද ඉන්න වද වෙන්න බෑ. ඒ නිසා මිනි බ්ලොග් මැරතන් දුවපු සපත්තු ජෝඩුව හොඳා.

මෙවරත් ගියවර වගේම මැරතන් බලන්න ක්‍රම කීපයක්ම සිංහල බ්ලොග්කරුවන්ගේ සංසදය මගින් සූදානම් කරලා තියනවා.

• මැරතන් බලන මූලස්ථානය (මැරතන් සින්ඩිකේටරය)
• මඩ කාමරේ (IRC chat room)
• තව ක්‍රම තියනවා

මීට අමතරව සුපුරුදු මඩ රේඩියෝවත් පැය 24ම ක්‍රියාත්මකයි. මෙවර එයට ටෙක්කතා එක් වී ‍තිබෙන නිසා තාක්ෂණික ගැටළු මේ පැය 24 පුරා සජීවීව ඉදිරිපත් කරලා විසඳුම් ලබාගන්න පුළුවන්. ඊට අමතරව ගීත ඉල්ලීම් සඳහාත් අවස්ථාව තියනවා.

මඩ රේඩියෝව අහන්නෙ මෙහෙමයි.
Windows Media Player : http://bit.ly/fxV62
Winamp/VLC/iTunes : http://bit.ly/McW59

ඔබ තවමත් ඔබේ මැරතන් බ්ලොග් අඩවිය ලියාපදිංචි නොකළේ නම් admin {at} sinhalabloggers {dot} com වෙත එහි විස්තර වහාම යවන්න. දුවන්න අදහසක් නැත්නම් දුවන අයට වතුර ගහන්නවත් ඒ පැත්තෙ ඇවිත් යන්න. මේක විවෘත ඇරයුමක්...! :)

වැස්ස වළාහක දෙවියන්ට කියැවුණු කන්නලව්ව

ගොයම කිරි වෙන්නෙ නුඹ හින්දලු සත්තයි
වනපෙත නිල් වෙන්නෙ නුඹ හින්දලු සත්තයි
මහ ගඟ ගලන්නෙත් නුඹ හින්දලු සත්තයි
නුඹ නැතිදා මං නෑ මැරෙණව සත්තයි

අවුරුදු ඒලු කොවුලගෙ ගී ගැයේයා
ගහ මුදුනට ඔන්චිල්ලා බැ‍ඳේයා
වැස්ස වළාහක දෙවියනි ඇසේයා
වැස්සොත් සතුට නෑ පොඩි හිත් බි‍ඳේයා

ආසයි ඉර වටේ ඔන්චිලි පදින්ටයි
ආසයි කද බැඳන් නෑයන් දකින්ටයි
සිරිමා බෝ සමිඳු වැඳ හිත් හදන්ටයි
අවුරුදු දුන්න දෙවියනි මේ අහන්ටයි

අවුරුදු එන්නෙ ගම්මැද්දේ රොක්වෙන්ටයි
එරබදු පිපෙන්නේ ගම හැඩ කරලන්ටයි
කෙත එළි කරන්නේ දඟ දෙන කොලුවන්ටයි
අපි මේ යදින්නේ වැහි නෑවිත් ඉන්ටයි

අවුරුදු කුමාරය නාවොත් ගම්මැද්දෙන්
සෙත් කවි ‍නොවෙයි වස් කවි ඔහෙ කියවෙද්දෙන්
වැහි දෙවියනේ කියනා මේ දුක සද්දෙන්
අහලා පමාවී එව අපි පිං දෙද්දෙන්

අහස ගුගුරුවා ගිය තැනකින් එන්ටයි
පොළව දෙදරවා ගිය තැනකින් එන්ටයි
හුළඟ දෙබෑකර ගිය තැනකින් එන්ටයි
සරු කර ගොයම මයෙ යළි යලටත් එන්ටයි

කුණා‍ටුව විනිවිද...

චණ්ඩ මේඝයක් ඇදී
දෙපළු කර මහ වනය
වළා කැටි එකතු කොට
ගුලි ගසා වීසි කර

ගුගුරුවා මුළු අහස
පතුරමින් මරබියද
ගස් කොළන් විනිවිදියි
සුදු විදුලි එළි යමින්

අනෝරා වැසි හැලෙයි
පොළොව පොඟමින් දසත
තෙත බරිත කරවමින්
ඇස ගැටෙන පලාතම

ඉරක් නැති ඉමක්‍ නැති
පිරිය නම් නෙතට නැති
අඳුර පමණක්ම ඇති
මහ මේඝ රජදහන

හා ඇවිද යනු මැදින්
නොවී කිසිදින සලිත
නුඹ නොවෙයි පළමුවා
මේ ගමන පය තබන

ලෝකයක් ඇත බලා
නුඹ දකින තුරු එළිය
සමබරව ඇදෙනු මැයි
නොසැලීම සිත නුඹ

© රූපය මවිසින් Illustrator සහ Photoshop භාවිත කරමින් අඳිනු ලැබූවක්.