මං ආස ගොම්මන එනකන්... (බලාපොරොත්තු!)

මුළු අහසම ගිණි තියලා
පලාතම ගිණි රතු පාටයි
කණකොකෙක් නොහඬාම යන්න ගියා
රාස්සිගෙ අව්ව කපාගෙන...

ඒත් තව මොහොතයි!
සීතල සුළඟක් හමා එන්න
මීදුමෙන් පලාතම වැහෙන්න
පිණි දිය පොදක් වැටෙන්න
ඉවසනවා... තව මොහොතක්...!

අපූරු හඬක නිහඬ වීම

සුවිශේෂී සංගීත නිර්මාණ හැකියාවෙන් සහ අපූර්ව වූ හඬින් රසික සිත් සැනසූ මර්වින් පෙරේරා කලාවේදියානන් අද දින දැයෙන් සමුගෙන ඇති බව පුවත් වලින් දැනගත් මට එය අදහාගත නොහැකි විය. මා කුඩාකල සිටම ඔහුගේ ගීතවලට ඇල්මක් දැක්වූවා. ඒ ඔහුගේ බොහෝ ගීතවල තිබුනු සරළ පදමාලා සහ සංගීතය නිසා වෙන්න ඇති. වික්ටර්ට ක්ලැරන්ස්ට මා සිතෙහි වූ තැනට සම තැනක් ඔහුටත් හිමිවුනා. මා මුලින්ම ඇසුවේ ඔහුගේ "මේ නගරය මා ඔබ මුණ ගැසුනු නගරයයි..." ගීතයයි. එතුමාගේ ප්‍රථම ගුවන්විදුලි ගීය "සඳ මිදුලට එනවා..." ගීතයයි. එයින් පසු ගැයූ ජනප්‍රිය ගී අතර "ඔබ දේදුන්න, ආදරේ රන් බිඟුන්, කතරක තනිවී, පබසර රන් වළලු, නිලුපුල් යුවලේ" ආදිය වේ.

නිතරම බොක්ස් ගිටාරයක් අතින් ගෙන අප දකින නිසාදෝ ඔහු බටහිර සංගීතයට බරවූ ශිල්පියෙකු ලෙස බොහෝදෙනා සිතා සිටියත්, භාරතීය ශාස්ත්‍රීය සංගීතය මැනවින් හැදෑරූ දක්ෂ වයලින් වාදකයෙකි. වෘතියෙන් සංගීත ගුරුවරයෙකි. මේ සියල්ලටම වඩා එතුමා දක්ෂ සංගීත නිර්මාපකයෙකි. වික්ටර් රත්නායකයන් ගයන "පාවේ වලා..." ගීය ඔහුගේ පළමු නිර්මාණයයි. නන්දා මාලිනිය ගායනා කරන "දෙවියන් විසින් දුන් පඬුරක් ලෙසින්..." ගීයද ඔහුගේ තවත් නිර්මාණයකි.

දක්ෂ ගායකයෙකු, සංගීත රචකයෙකු, වාදකයෙකු ඔහු ඒ සැමට වඩා නිරහංකාර මිනිසෙකි. එතුමා දැයෙන් සමුගන්නා විට 69 වැනි වියෙහි පසුවූයේය.

අපි වෙනුවෙන් අපි...!

අපට හුස්මගන්න ‍ඉඩහසර සළසන, අපේම සොයුරු රණ විරුවන් වෙනුවෙන් ලියවී ඇති මේ ගීතය මට මුලින්ම හමුවුනේ විදුලගෙ අහස කරා බ්ලොග් අඩවියෙන්. සිංහල බ්ලොග් ප්‍රජාව දැනටමත් මේ ගීතය එම බ්ලොගයෙන් දැක ඇතුවාට සැක නැතත්, මගේ බ්ලොගයේත් එය පළ කරන්න හිතුනා.

පෂ්චාත්තාපය නොහොත් හෘද සාක්ෂිය

කටට රහට තුං වේලම

ලුණු ඇඹුල් පදමට

උණු තේකක් හවසට!

ඩීසල් අඩු කළාලු

බස් ගණං බස්සලා

ගෑසුත්!

සුපර්මාකට් - ෂොපිං

කෑම -බීම - ඇඳුම් - පැළඳුම්

සේල්! සේල්!! සේල්!!!

අද සිකුරාදා

රෑට පාටි - ක්ලබ් - රට බීම

ඉරිදට ක්‍රිකට්!

දෙස් දෙවොල් තියනවා

හිත මටම බනිනවා

ඇයි මටත් බැරි උනේ

උඹ වගේ වෙන්න?

උඹ ඔහේ - මං මෙතන

ඇයි ද මන්දා

හිත මටම බනිනවා

ඒ ගැනම කියනවා

වන්නි යන ලොරියට

තැඹිලි - චොකලට් පටවලා

මම ම මගේ හිත රවටනව

මොහොතකට!