Friday, November 26, 2010

චීන චිත්‍රපට උළෙලක් කොළඹ දී

චීන තානාපති කාර්යාලය සහ ජාතික චිත්‍රපට සංස්ථාව එක්ව සංවිධානය කරනු ලබන චීන චිත්‍රපට උ‍ළෙලක් හෙට සිට දින හතරක් පුරා පැවැත්වේ. චිත්‍රපට සංස්ථා සිනමා ශාලාවේ දී නොමිලේ ප්‍රදර්ශනය කරන මෙහි චිත්‍රපට පෙළගැස්ම පහත දැක්වේ.


නොවැ 2‍7
     4.00pm Gimme Kudos
     6.00pm Crouching Tiger Hidden Dragon

නොවැ 2‍8
     4.00pm Li Mi Conjecture
     6.00pm Cell Phone

නොවැ 2‍9
     5.30pm The Volunteers

නොවැ 30
     5.30pm The Knot

Wednesday, October 20, 2010

පෙම් කෙලිය

කකියනව ඔලු ගෙඩිය
හිතලම උඹ ගැන
වෙන කිසිම දේකට
ඉස්පාසුවක් නෑ...

කැකෑරෙන ගොඩක් දේ
හිත ඇතුලෙ පොදි ගැහෙන
හම්බුවෙන ටික මොහොත
මදි හින්ද කියාගන්න
නින්දෙනුත් සාමීචියෙ
උඹ එක්ක...
හොඳ - නරක වාදෙ
හැමදාම වගේ...

ඒත් මොකද ඉතිං
පෙරේද බලපු හින්දියෙ වගේ
අන්තිමට හැමදේම
සතුටෙන්ම අහවර වේවි...!

Friday, September 17, 2010

ඔබේ දෑසින්...

අද දිනට යෙදී ඇති අනගාරික ධර්මපාල උතුමන්ගේ 146 වැනි ජන්මදිනය වෙනුවෙනි...

ඔබේ දෑසින්
අපේ හෙට දැක
යෙදූ දහිරිය
දැයේ සත වෙත

දෑත් දිගු කර
වැළඳ ගත්තද අප?

කට කොනින්
ඉඟි බිඟි සිනා පා
අවඥාවන් පොදි වලින්
දමා ගැසුවා පමණමැයි...

විරු දැයක් බිහිකරන්නට
අරා දෙරණම
නැගූ ඒ හඬ
යළි ඇසේ කවදාක

අහෝ! විස්සෝපෙන්
අප තවම යදිනවා
දෑත පා...

[පැරණි ලිපියක් - http://srishanu.blogspot.com/2007/09/blog-post.html]

Friday, September 03, 2010

මගෙ ආලෙ...




බඩගින්න හැරයන්න නැති උන්ට බත් කටක්
නොසෝදපු මූණු පොඩි ඇති උන්ට පොත් දෙකක්
අත්වාරු කරගන්න බැරි උන්ට කාසියක්
දීගන්න හිත වයන හැටි! අරුම ආලයක්!!


Tuesday, August 31, 2010

මගෙ ආලවන්තී...

ලේ තැවරුව කඩදහියක
ලියන්නෙ නෑ කුරුටු ගීත
කඩෙන් ගත්ත රෝස මලක
සුවඳ කෝම ඉවසන්නද

සත්කුළු පව් නැග එන්නට
සත්සමුදුරු බැස එන්නට
එහෙම ඕනෙ නොවුණු නුඹට
මගේ ආලකම දැනෙන්ට

ප්‍රශස්තියක් කියාගන්න
අවසරයක් නොදුන්නාට
හතර පෙලක් ඇටෙව්වාම
කියවාපන් වෙමින් කෝල!

Wednesday, August 04, 2010

රාජිත දිසානායකගේ නාට්‍ය තුනක්...!

ඔන්න නාට්‍ය ඔත්තුවක් බොහොම කාලෙකට පස්සෙ... මේ ගැන බොහෝ දෙනෙක් දැනටමත් දන්නව ඇති.

මේ වසරෙත් රාජිත දිසානායකගේ නාට්‍ය උළෙල පැවැත්වෙනවා ගිය වසර දෙකේදීම වගේ. ගිය අවුරුද්දෙ “නාට්‍යක්... නෑ හතරක්... බලමුද?“ කිව්වට බලන්න වුණේ එකයි. මං බලන්න ගිය එකම නාට්‍ය වෙච්ච ‘ආපහු හැරෙන්න බෑ‘ බලන්න අපේ දසුන් මලයත් ආව.

මෙවර වේදිකා ගත වෙන්නෙ නාට්‍ය තුනක් පමණයි.

ලයනල් වේන්ඩ්ට් නාට්‍ය උළෙලේ කාල සටහන මෙසේයි.

අගෝ 5 - ආපහු හැරෙන්න බෑ
අගෝ 6 - සිහින හොරු අරං
අගෝ 7 - වීරයා මැරිලා

සියළුම දිනවල සවස 7.00ට දර්ශන ආරම්භ වෙනවා.


ඡායාරූපය: http://freedomtheater.wordpress.com වෙතින්

Monday, July 19, 2010

රටා මැව්වට...


හිතේ නලියන
මගේ කතාව
ලියාගන්න
පායනකන් බලා ඉන්නද
තවත් තරුවක්

රටා මැව්වට
කතා හැදුනට
ඈත දිලෙන තරු රෑනෙ
නැගෙන ගින්දර
මට ඕනෙද?

ගෙදර ගින්දර
මොලවගන්නට
පාර දකින්න
එළිය කරන්න
බියකරු අඳුරු අහසේ
පායාපං
අලුත් තරුවක්

Tuesday, April 13, 2010

පරිවර්තන මැරතන් තරගය - 2010 අප්‍රේල්

ශ්‍රී ලංකාවේ පළමු වරට පරිවර්තන මැරතන් තරඟයක් 2010 අප්‍රේල් මස 27 දින රාත්‍රී 9.00 සිට 2010 අප්‍රේල් මස 28 වන දින රාත්‍රී 12.00 දක්වා පැවැත් වේ.

මෙහි අරමුණ වන්නේ දැනට අතුරු මුහුණතේ පරිවර්තන කටයුතු අවසන් වූ Openoffice.org සිංහල නිකුතුවට අදාල උදව් පිටු සිංහලින් සකස් කිරීමයි.
Openoffice.org සිංහල නිකුතුව සඳහා වචන 96,000 කට වඩා වැඩි ප්‍රමාණයක් සිංහලට හැරවීමට තිබු අතර මෙම උදව් පිටු සඳහා එමෙන් පස්ගුණයක් පමණ විශාල වූ කාර්යයක් නිම කිරීමට සිදුව ඇත.
100% නොමිලේ ලබා ගෙන Windows, GNU/Linux සහ MAC මත භාවිත කළ හැකි නිදහස් සහ විවෘත මෘදුකාංග අතරින් සුවිශේෂි මෘදුකාංගයක් වන Openoffice.org ව්‍යපෘතියට ආදරය කරන එමෙන්ම සිංහල බසින් මෘදුකාංග ප්‍රජාව අතරට යාම සඳහා දායකත්වයදීමට ලැදි ඔබ සැමට මින් ඇරයුම් කරමි.

ඔබ කොහොමඳ එක්වෙන්නේ?

Openoffice.org ශ්‍රී ලාංකික ප්‍රජාව භාවිත කරන තැපැල් ලැයිස්තුවට එක් වෙන්න.ඉන් අනතුරුව "Translation Marathon 2010 April "මාතෘකාව සහිතව ඔබේ සහයෝගය ලැබෙන බවට අපට විද්‍යුත් ලිපියක් එවන්න.
කරුණාකර මෙම මාතෘකාවම පමණක් භාවිත කරන්න.

ඔබ මොනවද දැනගත යුත්තේ?

සිංහල ලිවීම සඳහා සිංහල යුනිකෝඩ් භාවිතයෙන් ලිවීම අනිවාර්ය වේ. අදාල ඉංග්‍රිසි වදන් තේරුම් ගෙන එය සිංහලින් සරළව ලිවීමයි ඔබ කළ යුතු වන්නේ.
පරිගණක ක්‍රමලේඛනය පිළිබඳ දැනීමක් අවශ්‍ය නොවේ!

තනිවද තරග කරන්නේ?

ඔබට කැමති නම් තනිව හෝ කණ්ඩායමක් ලෙස තරඟ කළ හැක.
එනම් පාසැල්, විශ්ව විද්‍යාල, ආයතනික මිතුරන් සමඟ එක් රැස්වී තරඟ කළ හැක.

සයුරෙන් එහා ඉන්න මම?

ඔව් මව් රටින් බැහැර වුවත් ඔබටත් අන්තර්ජාලය හරහා දායක විය හැක.
පැය 27ක් පුරා දිවෙන බැවින් ඕනෑම වේලාකලාපයක කෙනෙක්ට සම්බන්ධ විය හැකියි. (දැනට එක්සත් රාජධානිය, සවුදි සහ ඉතාලියේ වෙසෙන ශ්‍රී ලාංකියන් සිව් දෙනෙක් සහය දීමට ඉදිරිපත්ව ඇත.)

Saturday, April 03, 2010

කුරොසාවා සිනමා උළෙල - AK100


අද්විතීය ජපන් සිනමාකරු අකිරා කුරොසාවා ගේ සිය වැනි ජන්ම දිනය නිමිතිකරගෙන කුරොසාවා සිනමා උළෙලක්
AK100 නමින් මෙම මස 5 සිට 7 දා දක්වා පැවැත්වේ. මෙය සංවිධානය කරනු ලබන්නෙ කොළඹ සිනමා කවය විසිනි.

චිත්‍රපට පෙළගැස්ම:

අප්‍රේල් 5
4:30 pm - Rashomon
7:00 pm - Late Autumn

අප්‍රේල් 6
4:30 pm - Equinox Flower
7:00 pm - Sanjuro

අප්‍රේල් 7
4:30 pm - The Makioka Sisters
7:00 pm - Ikiru

ස්ථානය: ජෝන් ද සිල්වා සමරු රඟහල
සියළුම දර්ශන නොමිලේ පැවැත්වේ.

මීට අමතරව මේ සියළු දිනයන්හි වාර දෙක බැගින් (පෙව 9.30 සහ පව 1.30) සිනමා වැඩමුළුද සංවිධානය කර ඇත.

Saturday, March 06, 2010

රෑ පිපුණු කුමුදිනී...

කුමුදිනී
සිනාසී
මද පවන්සර විඳී
තාල නූ පත් වැනී
රඟන්නී...

බඹර ගී මවන්නී
බඹර සුව සොයන්නී
ඒවි හිරු සමගිනී
සිහිනයෙන් දොඩන්නී...

පාන්දර එළිය වී
සිනා කැන් සලිත වී
මුකුලිතව පතිත වී
සිහිනයේ මරු දුටී...

ගුමු ගුමුව නොඇසිනී
හිරු එළිය නොවැටිනී
හිරු නොදිටි කුමුදිනී...

Wednesday, March 03, 2010

රුසියානු සාහිත්‍යයෙන් නිමැවුනු රිදී සිත්තම්

අග්‍රගණ්‍ය රුසියානු සාහිත්‍ය කෘති ඇසුරෙන් නිර්මාණයවුණු රුසියානු චිත්‍රපට පෙළක් මේ දිනවල රුසියානු සංස්කෘතික කේන්ද්‍රයේදී ප්‍රදර්ශනය කෙරේ.

The Flight


ලියෝ තෝල්ස්තෝයි, මැක්සිම් ගෝර්කි, ඇලේක්සැන්ඩර් ඔස්ත්‍රොව්ස්කි, ඉවාන් තුර්ගෙනෙව්, ඇන්ටන් චෙටකොෆ්, පියෝදෝර් දොස්තයෙව්ස්කි, මිහායිල් බුල්ගාකොව්, මිහායිල් ෂෝලහව් ආදී විශ්ව සාහිත්‍යයේ නොමැකෙන සළකුණක් සටහන් කල රුසියානු ගත්කතුවරුන්ගේ කෘති ඇසුරෙන් නිමැවුනු මේ සිනමා සිත්තම්ද ලෝක සිනමාවේ විශිෂ්ඨ නිර්මාණ ගණයෙහිලා සැළකෙයි.

චිත්‍රපට පෙළගැස්ම මෙසේයි...
Nest of the Gentry (ඉවාන් ගුර්ගෙනෙව්) - මාර්තු 10
The Flight (මිහායිල් බුල්ගාකොව්) - මාර්තු 17 / 24 කොටස් දෙකක් වශයෙන්
War and Peace - මාර්තු 31 / අප්‍රේල් 07 / 15 කොටස් තුනක් වශයෙන්

සෑම බදාදා දිනක සවස 6ට කොළඹ රුසියානු සංස්කෘතික කේන්ද්‍රයේදී මෙය නොමිලේ ප්‍රදර්ශනය කෙරේ.

රුසියානු සංස්කෘතික කේන්ද්‍රය
අංක 10, නිදහස් මාවත, කොළඹ 10

WikiMapia
රුසියානු තානාපති කාර්යාලය

ප.ලි.
පසුගිය ජනවාරියේ පටන් අරඹා ඇති මෙම චිත්‍රපට උළෙල ගැන දැනගැනීමට ලැබුනේ පෙබරවාරියේ වුවද, එහි පෙළ ගැස්මක් ආදී තොරතුරක් සොයාගත නොහැකි වූයෙන් මේ සටහන පලකිරීමට පමා විය. පෙබරවාරි 18 වැනි දා දිවයින වටමඩල අතිරේකයෙන් මෙම තොරතුරු උපුටා පළ කරන ලදී.

Wednesday, February 10, 2010

නළඟන නුඹයි...

පිරිපුන් සිතක් කොයි අතකවත් නැත කුරිරු වූ අඳුරම පැතූ
පිරිපුන් ගතක් වෙද කොයි ලෙසත් අනෙකෙකුගෙ සතුටට පෙම් කෙරූ
කඳුළක් නොදත් සතුටේම මිරිඟුව හඹා මුසපත් වී ගැලූ
ලෝකයක් තුළ ආඩම්බරක් නුඹ මගේ සිත කණපිට බැලූ

ආලයක් නොදැනෙන ලෝකයක් තුළ නුඹෙ නුවන් එළියක් මුසූ
තාලයක් නොඇසෙන ලෝකයක් මත නු‍ඹෙ සිනා සිසිලක් ගැලූ
ප්‍රීතියක් එපමණ දුකක් මුසු කළ මා සිතේ සදහට තැබූ
ගීතයක් නෑසුන නළඟනක් නුඹ හදවතින් රිද්මය ඇසූ

විරු දුව නුඹයි ලෝ කවිය නොඇසුව දනන් හට අරුතක් ලියූ
සොයුරිය නුඹයි එක තාලයට පා සළඹ සොලවන හැටි කියූ
මුදු නල නුඹයි මා වෙත හැමූ රූ සිරි මවා මා හද පෙලූ
නළඟන නුඹයි සුසුමක් මුසූ කඳුළක් අරන් මා හද සැලූ



පසුගිය ජනවාරියේ 15 වැනිදා බිෂොප් විද්‍යාලයීය ශාලාවේ IIT Stage Craft ප්‍රසංගයේ වූ එක් අංගයක් මා සිත් තුළ තවමත් රැව් පිළිරැව් දෙයි. එය කම්පනයකි, චිත්තප්‍රීතියකි, සංවේගයකි, ආඩම්බරයකි, සුසුම්ලමින් මෙනෙහි කළ හැකි සංවේදී හැඟීමකි. ඒවූ කලී රත්මලාන විශේෂිත පාසලේ ශිෂ්‍යාවන් පිරිසක් විසින් අපූරුවටත් තාලයටත් ඔවුනට නෑසෙන ගීයේ ලාලිත්වයටත් ඉදිරිපත් කරන ලද නර්තන අංගයකි. ඒ රස විඳීමෙන්
මා සිත්තුළ ජනිතව ගැලූ නිමක් නැති සිතුවිලි හැකි ලෙසින් එක් කොට මේ නිමක් නැති කව ලියූයෙමි.

Sunday, January 31, 2010

හෙට දවස දකින්න... ලුම්බිණියට එන්න...

30 වැනි යොවුන් නාට්‍ය උළෙල පෙබරවාරි 01 දා සිට 13 දා දක්වා කොළඹ ලුම්බිණී රඟහලේදී පැවැත් වේ. සෑම දිනකම ප.ව. 6.30 ට ඇරඹෙන මෙම උළෙල සංවිධානය කිරීමට එක්වන්නෙ ජාතික තරුණ සේවා සභාව සහ තරුණ කටයුතු අමාත්‍යාංශයයි.

මෙවර උළෙලේ විශේෂත්වයක් වන්නේ ප්‍රථම වරට අම්පාර, යාපනය, මන්නාරම, මඩකලපුව සහ වව්නියාව යන දිස්ත්‍රික්ක වලින් දෙමළ කෙටි නාට්‍ය පිටපත් 47ක් ඉදිරිපත් වීමත් ඉන් 4ක් අවසන් වටය සඳහා තේරීමත්ය. සිංහල අංශයෙන් ද කෙටි නාට්‍ය පිටපත් 316ක් සහ නාට්‍ය පිටපත් 31ක් ඉදිරිපත් වී ඇත.

නාට්‍ය පෙළගැස්ම මෙසේයි...

පෙබරවාරි 1:
කූඩුවට එනකං - ගයාන් දේශප්‍රිය
අල්පෙනිති ඔළු - දිනූෂා ජයකොඩි
ක්‍රිකට් ගහන්න එන්න - චමිල ප්‍රියංක

පෙබරවාරි 2:
අමුතු හිරගෙයක් -
චමරු පතිරණ

පෙබරවාරි 3:
බල්ලො දෙන්නෙක් - ආනන්ද චන්ද්‍ර කුමාර
ආදරයක් කතා කරයි - දමිත් වැලිතල
සපත්තු මල් - හිරාන් සෙනෙවිරත්න

පෙබරවාරි 4:
පෙම් යුවළක් හා පෙම් යුවළක් - චාමර දේශප්‍රිය
මට නුඹ - කේ.ටී. දිල්හානි
මොහොතකට පසු - විදුර ශානකගේ
මයික්‍රොසොෆ්ට්ලාගේ අඳෝනාව - තරිඳු අබේසිරිවර්ධන

පෙබරවාරි 5:
ගෙන්දගම් උයන -
අයේෂා දිසානායක/ලක්මාල් චමින්ද

පෙබරවාරි 6:
රාජ්‍ය සේවය පිණිසයි - විජිත මැදවලගේ
සීතල පොද වැස්සක් - මොහොමඩ් ඉල්මි හසීම්
අත්තානං - හර්ෂ තෙන්නකෝන්

පෙබරවාරි 7:
නොකීවයි කියන්නෙපා - මලික් සුදම්ත ජයසිංහ
ප්‍රමාදය - එම්.පී. අනුරසිරි
සෙවැණැලි - තාරුක පුෂ්ප කුමාර/සමන් කුමාර ගමගේ

පෙබරවාරි 8:
අගමෙම්නොන් - ගයාන් රන්දීර

පෙබරවාරි 9:
පෙට්ටියක් දෙදහයි - ප්‍රදීප් කුමාර රාජපක්ෂ
හමුවීම - පාලිත අබේලාල්
ඩීසන් දෙන්නෙක් - සංජය රොෂාන්

පෙබරවාරි 10:
කුමාරවරු ඇවිත් - ගේවගේ බන්දුල

පෙබරවාරි 11:
සජීවී ටෙලි නාට්‍ය - චමින්ද අමරදාස
පරපුටු - යසන්ත කරුණාරත්න
පුංචි ජනේලය - ලංකා බණ්ඩාරනායක

පෙබරවාරි12:
මනිතම් - සෙල්වරාජා සීලාරන්
එම්මයි වාල විඩුංකල් - ටී. ජේසුදන්
තිරාදතාගම් - පවලසිංහගම් සිරිදරන්
කඩවුලුක්කෝර් කඩිදම් - කේ. ඉන්දිරාජා

පෙබරවාරි13:
හිස්අවකාශයේ පුටුව අරන් - එම්.සෆීර්

තොරතුරු 'දිවයින සිනමා කලා' (2010 ජනවාරි 29) අතිරේකය ඇසුරින්...

Friday, January 22, 2010

දේදුන්න කොච්චර කැතද...?

සුදු පාටට ගලාගෙන
ලෝකෙම අවදි කරන්න එන
ඉර එළිය

කඩා... බින්න කර
පාට පාට
විතරක් පෙන්නන
වැහි බිංදුව කොච්චර නපුරුද...?

දේදුන්න කොච්චර කැතද...?

Wednesday, January 13, 2010

[ Guest Post ] කවුළු දුර...

නමින් උපසමිත වූ මා මිතුරා විසින් ලියූ මේ පැදි පෙල මෙහි පළ කරන්නෙ කිසිදු සංස්කරණයකින් තොරවය. බ්ලොග් ලියන්නෙකු නොවන නමුදු ඔහුගේ සේයාරූ දස්කම් මෙතැනින් බලාගත හැක.

කවුළු දුරකි එපමණකි ඔබ මා අතර රැඳෙනා
දැනුනි පහසක් සිතට මුත් ගත සැලෙනා
නැත කිසිවක් වී වෙනස්, මද සිනහව, සියුමැලි වදන්
ඇසුනේ කණට නොව සිතටයි.
තව තවත් ළංවෙවී ඔබ වෙතට ගතින් නොව සිතින්

සිහිනයක් වූ අතීතය, හැබෑවක් කර ඇත අද ඔබ
බලාසිටියෙමි උපේක්ෂාවෙන්
කවුළු දුරකි එපමණක් ඔබ මා අතර

ඉඩ නොදෙයි මා නෙතු ඔබෙන් ගැලවෙන්නට එදා මෙන්
අදත්, මද සිනහව, සියුමැලි වදන්

ඔබ රන් මුදුව, මොහොතකි අඳුරු කළේ මා දෙනුවන්
වසාගතිමි මා නෙතු යුග නමුදු නොව මා සිත
දුකද සතුටද මා සිත දවන නොදනී නමුත්

සංසාර දුරකි ඔබ මා අතර දුර
සිටියද කවුළුවෙන් එතෙර ඔබ



09/01/2010
අවන්හලකදී